ސަރުކާރު ކުންފުނިތަކުން ލިބުނު ފައިދާ ދަށަށް ހިނގައްޖެ

ސަރުކާރު ކުންފުނިތަކަށް ލިބުނު ފައިދާ ދަށްވެ ޑިވިޑެންޑުން ބަޖެޓަށް ލިބުނު އާމްދަނީ %25 ދަށަށް ހިނގައްޖެ އެވެ.

ވީ ކިހިނެއް؟ - މާލީ ވުޒާރާއިން އާންމުކުރާ ދައުލަތުގެ އާމްދަނީ އާއި ހަރަދުގެ އެންމެ ފަހުގެ ހިސާބުތަކުން ދައްކާ ގޮތުން މި މަހުގެ 1ގެ ނިޔަލަށް ސަރުކާރު ހިއްސާވާ ކުންފުނިތަކުން ޑިވިޑެންޑުގެ ގޮތުގައި ބަޖެޓަށް ލިބިފައިވާ އާމްދަނީއަކީ:

483.2 މިލިއަން ރުފިޔާ

މިއީ މިދިޔަ އަހަރާ އަޅާބަލާއިރު 166 މިލިއަން ރުފިޔާ މަދު އަދަދެއް

އެ މުއްދަތުގައި މިދިޔަ އަހަރު ޑިވިޑެންޑުން 649 މިލިއަން ރުފިޔާ ލިބިފައިވޭ

ތަފްސީލް - މިއަހަރަށް މަޖިލީހުން ފާސްކޮށްދިން ބަޖެޓުގައި ލަފާކޮށްފައިވާ ގޮތުން ޑިވިޑެންޑުގެ ގޮތުގައި 552.3 މިލިއަން ރުފިޔާ ލިބޭނެ އެވެ. މިހާތަނަށް މި ވަނީ ލަފާކޮށްފައިވާ އަދަދުގެ %87 ލިބިފަ އެވެ.

ބަޖެޓުގައި ހުރި ހިސާބުތަކަށް ބަލާއިރު މިއަހަރުގެ މިހާތަނަށް ސަރުކާރުގެ ކުންފުނިތައް ހިންގުމަށް ކެޕިޓަލްގެ ގޮތުގައި ވަނީ:

903 މިލިއަން ރުފިޔާ ދޫކޮށްފައި

930 މިލިއަން ރުފިޔާ ކުންފުނިތަކަށް ދޫކުރަން ބަޖެޓްކޮށްފައިވޭ

ސަރުކާރު ހިއްސާވާ 30 އަށް ވުރެ ގިނަ ކުންފުނި އެބަހުއްޓެވެ. އޭގެ ތެރެއިން ގިނަ ކުންފުނިތައް ހިންގަނީ ގެއްލުމުގަ އެވެ.

މަޢުލޫމާތު: ދައުރު